CIG-SERVIZOS PROTESTA CONTRA O DESPEDIMENTO DUN AFILIADO EN EROSKI

2010-05-17T14:11:00.003+02:00

Delegados sindicais e traballadores de Vegalsa-Eroski realizaron o 24 de febreiro unha concentración en coincidencia coa inauguración dun novo hipermercado na Coruña para protestar contra o despedimento dun afiliado que conformaba a candidatura para as eleccións sindicais. A concentración tamén serviu para censurar a explotación laboral e a persecución sindical na empresa.
24/2/10.Estes feitos amosan, máis unha vez, a actitude antisindical do Grupo Vegalsa e a tentativa constante de eliminar a presenza das organizacións que non están dispostas a asinar o penoso convenio estatal.

Xornadas superiores ás 10 horas

O persoal que traballou o día da inauguración do Eroski-Center do barrio de Matogrande iniciou a xornada laboral ás 8:15 e saíu ás 15:05 horas e proseguiu desde as 18:00 até as 21:00 horas. De aí, os empregados tiveron que se desprazar até a tenda antiga para realizar o inventario.

Vegalsa, que participa co 50% do capital do Grupo Eroski en Galiza, mantén uns salarios inferiores aos da competencia con subas do 1% fronte ao 3´5% do resto do sector e malia acumular beneficios millonarios.

A política de recursos humanos é inflexíbel e autoritaria e maniféstase en sancións aos traballadores que se negan a modificar os seus horarios ao antollo da empresa, en despedimentos arbitrarios ou na denegación de permisos para conciliar a vida laboral e familiar. Ademais, é preciso recorrer á Xustiza para conseguir o goce destes últimos.

Concentración na sede de Vegalsa-Eroski de A Coruña o 13-05-2010 para denunciar a represión sindical aos delegados/as da CIG

2010-05-17T13:55:00.003+02:00

A empresa pretende evitar que a central manteña informados os/as traballadores/as sobre a súa realidade laboral
Delegados e delegadas da CIG concentráronse esta mañá diante da sede de Vegalsa-Eroski no Polígono de Agrela para denunciar a política de represión sindical que a empresa está a pór en práctica. Dende a CIG-Servizos criticaron que Vegalsa vén de sancionar a unha delegada da central, baixo falsas acusacións, con 16 días de emprego e soldo, dentro dunha manobra para evitar que os traballadores e traballadoras sexan conscientes de que son os peores pagados/as do sector. No marco dunha intensa campaña informativa entre os traballadores e traballadoras de Vegalsa-Eroski, delegados e delegadas da CIG desenvolveron esta mañá unha protesta diante da sede da empresa no polígono de Agrela para denunciar publicamente a política de represión continuada que a compañía está a manter coa central sindical. O obxecto desta coerción, explicaba durante o decurso da concentración Roberto Pérez, responsábel de comercio da CIG-Servizos, é evitar que o conxunto do persoal sexa consciente da verdade: que os seus salarios están un 15% por debaixo do seu convenio.

Pérez indicou que a CIG está a desenvolver unha exhaustiva campaña de información aos traballadores e traballadoras de Vegalsa “que molesta máis á empresa que calquera protesta, porque o que pretenden é que o persoal estea desinformado a respecto da realidade dos seus salarios e dos seus dereitos”.

De feito, apunta, a compañía busca “aniquilar os sindicatos, en vez de dialogar”, e neste momento ten sancionada, baixo falsas acusacións, á presidenta do Comité de empresa con 16 días de emprego e soldo. Doutra volta, Vegalsa-Eroski xa tentara sancionar a outra delegada tamén con mentiras, mais “non se atreveron a chegar a xuízo”, aclara Pérez.

Neste senso, subliñaba que a concentración desta mañá concibiuse como unha denuncia pública desta situación e como mostra de apoio á delegada represaliada.

CIGEROSKI

CIG-SERVIZOS PROTESTA CONTRA O DESPEDIMENTO DUN AFILIADO EN EROSKI

Concentración na sede de Vegalsa-Eroski de A Coruña o 13-05-2010 para denunciar a represión sindical aos delegados/as da CIG